ဆာမူရိုင်း စစ်နယ်ရှင် (warlords)တိ အချင်းချင်း အာဏာလုမှုတိနန့် မငြိမ်းချမ်းနီရေ ဂျပန်ပြည်ကို တိုကူဂါဝါ အီအိယားဆု (Tokugawa Ieyasu) က သိမ်းပိုက်စုစည်းပြီးကေ ၁၆၀၃ ခုနှစ်ကနီ ၁၈၆၈ ခုနှစ်အထိ ချိုဂင်(Shogun) အဖြစ် အုပ်စိုးခရေ။ ပုန်ကန်ထလွှားခြင်း၊ တိုက်ခိုက်သတ်ဖြတ်ခြင်း၊ သံမဏိလက်နန့် အုပ်ချုပ်ခခြင်း စရေ တခြား အနိဌာရုံ တချို့ ဟိခကေလေ့ တခြားခေတ်တိနန့် ချိန်လိုက်ကေ အတော်အသင့် အီးချမ်းရေ ဂျပန်နိုင်ငံတစ်ခုဖြစ်ခရေ။  ဗုဒ္ဓဘာသာနန့် ကွန်ဖြူးရှပ်အယူဝါဒတိ လွှမ်းမိုးခြင်းခံနီရရေ ဂျပန်လူမှု့အဖွဲ့အစည်းကို ဆက်လက်ထိန်းသိမ်းနိုင်ဖို့အတွက် ခရစ်ယာန်ကတ်သလစ်ဘာသာပြန့်ပွားရေး လာလုပ်တေ ပေါ်တူဂီစရေ အနောက်နိုင်ငံသားတိကို နှင်ထုတ်ခရေ။ ဒတ်ရ်ှလူမျိုးတချို့ကိုရာ နီရာတစ်ခုမှာ အကန့်အသတ်နန့် နီထိုင်စီခရေ။

ယင်းခေတ်ယင်းအခါက ဂျပန်လူဦးရေ၏ ၁ ရာခိုင်နှုန်းဝန်းကျင်ဟိရေ အုပ်ချုပ်သူ ဆာမူရိုင်းတိရေ ကုန်သွယ်စီးပွားလုပ်ခွင့်မဟိ။ ပြည်သူ့အခွန်တိနန့် ရပ်တည်နီကတ်စွာ ဖြစ်တေ။ တိုင်းပြည်ကလေ့ ငြိမ်းချမ်းပြီးကေ စီးပွားရေးကောင်းလာနီရေခါ စစ်တိုက်ဖို့လေ့ မလိုရေ အတွက် စာဖတ်ရေဖက်ကို ယိမ်းလာကတ်တေ။ နောင်အခါ တိုကျိုမြို့လို့ ဖြစ်လာဖို့ဒေသဖြစ်တေ အက်ဒို (Edo) မှာ နီထိုင်ကတ်တေ ၈၅ ရာခိုင်နှုန်းသော ယောင်္ကျားတိရေ စာဖတ်အားသန်ကတ်တေ။ ၁၈၀၀ ခုနှစ်ဝန်းကျင်မှာ အဆင့်အတန်းမြှင့်ရေ ကဗျာစာပီအသိုင်းအ၀ိုင်း ၁၂၀ ကျော် ပေါ်ထွန်းလာပြီးကေ စာအုပ်ဆိုင်ပေါင်း ၅၀၀ ၀န်းကျင်ထိ ဟိလာရေ။ လူထုစာဖတ်အားကို ဖြည့်ဆီးပီးနိုင်ဖို့အတွက် ပုံနှိပ်လုပ်ငန်းတိလည်း အရှိန်အဟုန်မြှင့်ထွန်းကားလာရေ။

အနောက်တိုင်းသားတိ၏ ၀င်ရောက်လွှမ်းမိုးမှုကို ကာကွယ်နိုင်ဖို့အတွက် တိုင်းပြည်ကို တခြားကမ္ဘာနန့် အဆက်အသွယ်ဖြတ်ထားခရေ အချိန်မှာ ဂျပန်ဆရာဝန်တစ်ယောက်က ဒတ်ရ်ှဘာသာနန့် ရီးထားရေ ခန္ဓာဗေဒ စာအုပ်တစ်အုပ်မှာပါရေ ပုံတိကို လားတွိရေ။ ယင်းပုံတိကို စိတ်ဝင်တစားဖြစ်လာယင်းကနီ ဒတ်ရ်ှဘာသာကို လေ့လာလိုက်စားပြီးကေ ယင်းစာအုပ်ကို နားလည်အောင် လုပ်ခရေ။ ငါရို့ရေ လူ့ခန္ဓာဖွဲ့စည်းပုံကို ဂဃဏန မသိပဲ ဆီးကုနီကတ်မနားကူး ဆိုပြီးကေ စိတ်ထိခိုက်လွန်းလို့ ယင်းစာအုပ်ကို အများပြည်သူသိအောင် ဂျပန်ဘာသာပြန်ဆိုခရေ။ အာဏာရ ချိုဂင်ကလေ့ နိုင်ငံခြားသားတိအန္တရာယ်ကို စိုးရိမ်ကေလေ့ နောက်ပိုင်းမှာ အနောက်တိုင်းသား စာပီတိကို ရိုက်နှိပ်ခွင့်ပီးခရရေ။ ယင်းကနီ စပနာ သိပ္ပံဘာသာရပ်တိ ထွန်းကားစပြုလာရေ။ နောက်ပိုင်းမှာ ကိစ္စ၀စ္စတိကို သိပ္ပံနည်းကျ လေ့လာဖို့ လမ်းကြောင်းသစ်ကို အစပျိုးပီးခရေ။

ယေတောင် ချိုဂင်က အနောက်တိုင်းစာပီဖြန့်ထွားမှုကို ဖွင့်ပီးစွာ နောက်ကျရေပဲ ပြောရဖို့လား၊ ပြည်သူတိကပဲ အနောက်တိုင်းသားဆိုကေပင် (သူရို့ရီးသားထားရေ စာအုပ်အားလုံးပင်) အားလုံး မကောင်းလို့ ထင်နီလို့လားတော့ မသိဗျာလ်။ ဂျပန်ရေ ယင်းခေတ်ယင်းအခါက စက်မှုထွန်းကားရေ၊ တီထွင်မှုအားကောင်းရေ နိုင်ငံမဟုတ်ခ။ ၁၈၅၄ မှာ အမေရိကန် ရီတပ်အရာရှိ မတ်သူး စီ ပယ်ရီ (Matthew C. Perry) ဦးဆောင်ရေ ရီနွီးငွေ့သုံး စစ်သင်္ဘောတိ ရောက်လာခါမှ ငါရို့နိုင်ငံရေ တပျင်းနောက်ကျကျန်လိုက်ပျာယ်မနား ဆိုစွာကို သိလာကတ်တေ။ နောက်ပိုင်းမှာ ချက်ချင်းနိုးထပြီးကေ Combine "western advances" with the traditional "eastern" values လို့ ဆိုရေ အနောက်တိုင်း၏ ရှေ့ပြေးမှုကို မိရိုးဖလာ အရိတိုင်းစံများနန့် ပေါင်းစပ်ရေး ဆိုပြီးကေ ကြွေးကြော်ပနာ တိုးတက်ရေးလုပ်ငန်းရပ်တိကို တဟုန်ထိုး လုပ်လာခရေ။



မီးရထားလမ်းဆက်သွယ်မှုဆိုစွာကို အမေရိကန်ကပဲ မိတ်ဆက်ပီးခစွာဖြစ်တေ။ ယေကေလေ့
တစိုက်မတ်မတ် ကြိုးစားတတ်တေ လူတော်လူချွန်တိဟိနီမှု၊ လူများထက်နောက်ကျနီမှုကို မခံချင်စိတ် ဟိနီမှု၊ ယင်းမခံချင်စိတ်ကို တိုးတက်ကြီးပွားရေး လမ်းမှန်သို့ အားတစ်ခုအဖြစ် ပြောင်းလဲနိုင်မှု၊ စည်းကပ်သေ၀ပ်မှု၊ လူတော်လူကောင်းတိကို မြှောက်စားအားပီးရေ အသိုင်းအ၀ိုင်းဟိမှုတိ စရေ တိုးတက်တေ လူမှုအဖွဲ့အစည်းမှာ မရှိမဖြစ်လိုအပ်တေ အင်္ဂါရပ်တိကြောင့် ဂျပန်တိရေ အနောက်တိုင်းသားတိ တီထွင်ခရေ ရိုးရိုးရထားကို ကျည်ဆန်ရထားတိပိုင် အဆင့်မြှင့်လမ်းပန်းဆက်သွယ်ရေးစနစ်ကြီးတစ်ခုအဖြစ်သို့ ပြောင်းလဲ တီထွင်လားနိုင်ခရေ။ ကမ္ဘာ့မီးရထားဆက်သွယ်ရေးလုပ်ငန်းမှာ နံပတ်တစ်နီရာကို ဗိုလ်စွဲလာခရေ။ ယင်းပိုင်ပျာယ် တခြားကဏ္ဍအသီးသီးမှာလည်း တိုးတက်ထွန်းကားလာခပြီးကေ မကြာသိရေ နှစ်အနည်းငယ်အထိ ကမ္ဘာ့စီးပွားရေး ဒုတိယအင်အားအကြီးဆုံးနိုင်ငံအဖြစ် ရပ်တည်နိုင်ခရေ။



အထက်ပါ ဂျပန်အခြေအနေကို လေ့လာကြည့်ကေ ပြည်ပကမ္ဘာနန့်အဆက်အသွယ်ဖြတ်လိုက်လို့ ခရစ်ယာန်ဘာသာ ပြန့်ပွားမှုကို ကာကွယ်နိုင်ကေလေ့ စက်မှုလက်မှုနန့် နိုင်ငံတိုးတက်ရေးမှာ နောက်ကျလားစွာကို တွိရရေ။ အေဂုခေတ်မှာ မိမိလူမှု့အဖွဲ့အစည်း၏ စံနှုန်းကို ကာကွယ်ဖို့အတွက် ယင်းပိုင် အထီးကျန်အဖြစ် ရပ်တည်လို့ ရနိုင်ဖို့လား။ မိုဘိုင်းဖုန်းတိ၊ အင်တာနတ်တိ ပေါ်နီရေ ခေတ်မှာ လုံးဝအထီးကျန်နီဖို့ ဆိုစွာက မဖြစ်ပါပျာယ်။ မြန်မာနိုင်ငံ အထီးကျန်ရပ်တည်ခရေလို့ ဆိုကတ်ကေလေ့ အနောက်ဘက်က ကုလားတိ ၀င်နီခရေ။ တနည်းအားဖြင့်ဆိုကေ နိုင်ငံရေးအရ အထီးကျန်ကေတောင်မှာ တခြား ယဉ်ကျေးမှု၊ လူမှုရေး၊ ဘာသာရေး စရေ ဆိုင်ရာဆိုင်ရာ ဆက်ဆံမှုတိက ရပ်မလား။ အထူးသဖြင့် ရခိုင်ပြည်၊ မြန်မာပြည်က ဂျပန်ပိုင် ရီပတ်လည် ၀ိုင်းရံနီရေ ကျွန်းနိုင်ငံမဟုတ်။

ရခိုင်ပြည်၏ မြောက်ဦးခေတ်ကို အထွတ်အထိဋ်သို့ ဆောင်ကြဉ်းမြှင့်တင်ပီးခရေ ပြည်ကြီးသျှင် ဘုရင်မင်းဗာရေ ဒတ်ရ်ှလူမျိုး၊ ပေါ်တူဂီလူမျိုး၊ အိန္ဒိယလူမျိုးစရေ လူမျိုးပေါင်းစုံ၊ ဘာသာ ပေါင်းစုံနန့် ကူးလူးဆက်ဆံခရေ။ ဘုရင့်ဘဏ္ဍာတိုက်ထဲသို့ ၀င်ရောက်လာရေ အခွန်ငွေတိကို မိမိဘာသာ၊ မိမိလူမျိုးအဓွန့်ရှည်ဖို့အတွက် လိမ္မာပါးနပ်စွာ အသုံးပြုခရေ။ နိုင်ငံ၏ ကုန်းတပ်၊ ရီတပ်၊ စာပီ၊ ယဉ်ကျေးမှု၊ ဗိသုကာ ဖွံ့ထွားကြီးမားခစွာတိကို အဂုတိုင် သမိုင်းပုံရိပ်တိက ညွန်ပြနီရေ။ ယင်းအချက်က နိုင်ငံတစ်ခု၊ လူမျိုးတစ်ခုရေ မိမိနိုင်ငံနယ်နိမိတ်၊ မိမိလူမှုအသိုက်အအုံကို ပိတ်မထားပဲ ဖွင့်ပနာ တခြားလူမျိုး၊ နိုင်ငံတိနန့် ဆက်သွယ်ကူးလူးခြင်းဖြင့် အများကြီး တိုးတက်နိုင်ရေ ဆိုစွာကို ထောက်ပြနီရေ။

မင်းဗာဘုရင်၊ အဖိုးသျှင် သျှင်မြ၀ါနန့် ပညာဟိကြီး မဟာပညာကျော်ရို့ရေ အနောက်ဘက်ကို ခရီးဆန့်လို့ စာလားသင်ခကတ်တေ။ နိုင်ငံခြားက ပညာရှင်တိကို မိမိနိုင်ငံကို မခေါ်ယူနိုင်သိလို့ ယင်းပညာဟိတိ ဟိရေ နီရာကို လားပြီးကေ သင်ခကတ်တေ။ ပြီးကေ ကိုယ့်ပြည်ကို ပြန်ပြီးကေ အသုံးချပနာ ခေတ်မီတိုးတက်ရေ ဘုရင့်နိုင်ငံတော်ကြီးကို တည်ဆောက်ခကတ်တေ။

ပြောင်းလဲနီရေ ကမ္ဘာမှာ လူမှု့အဖွဲ့အစည်းရေ တစ်ခုတည်း သီးသန့်ရပ်တည်နီလို့ မရပျာယ်။ မိမိရို့ စံနှုန်းနန့် ၁၀၀ ရာခိုင်နှုန်း မတူလို့ ယင်းလူတိနန့် မဆက်ဆံပျာယ်ဆိုလို့ မရ။ Global economy ဖြစ်လာရေ ခေတ်မှာ၊ Free trade ခေတ်မှာ တချို့ ပယ်သင့်ရေ အရာကို ပယ်လို့ ယူသင့်ရေ အရာကို ယူကတ်ရဖို့။ အလဲအထပ် လုပ်ချင်ကေလေ့ လုပ်ကတ်ရဖို့ဂါ။ ဆုံးရှုံးမှုတချို့ ဟိဖို့ပိုင် အကျိုးအမြတ်တိလေ့ အများကြီး ဟိနီဖို့။ ကိုယ့်လူမျိုးရို့၏ စံနှုန်းစံထားတိကို အများကြီး ကာကွယ်ထိန်းသိမ်းဖို့ကျကေ ကာကွယ်ကတ်ရဖို့ပိုင် လွဲမှားရေ ခေတ်မမီလားပျာယ်ဖြစ်တေ အယူဝါဒတချို့ကိုလေ့ စွန့်လွှတ်ကတ်ရဖို့။ လူ့အခွင့်အရေးဆိုရေ စံနှုန်းတိရေ အနောက်တိုင်းက လာစွာဖြစ်ကေလေ့ ကောင်းရေ စံနှုန်းဖြစ်လို့ လက်ခံကျင့်သုံးကတ်ရဖို့။ ပိုင်ဆိုင်ခွင့် (Property Rights)၊ မူပိုင်ခွင့် (copy rights) တိကို ဖွံ့ဖြိုးတိုးတက်ချင်ရေ နိုင်ငံတိအနေနန့် ကျင့်သုံးကတ်ရဖို့။ တော်ယင့်သားနန့် မိန်းမချေတိကို စိတ်မချလို့ မိဖအိမ်ကနီ တစ်ခုကိုလေ့ မလွှတ်ပဲ အိမ်မှာ ထမင်းချက်အဖြစ်ရာ ထားနီစွာတိမဖြစ်သင့်ပျာယ်။ မိဖနန့် သားသမီး နှစ်ဖက်စလုံး အဆင်ပြေနိုင်ရေ၊ တိုးတက်မှုကို ရှေ့ရှုရေ လမ်းကြောင်းတိကို ယှာကတ်ရဖို့။ သိပ္ပံနည်းကျလေ့လာဆန်းစစ်မှုတိကို အားပီးကတ်ရဖို့။

အဓိကနန့် သာမည ကို ခွဲခြားပိုင်းခြားနိုင်မှု (critical thinking)နန့် ပြောင်းလဲကျင့်သုံးလုပ်ကိုင်တတ်မှု(adaptability)ရေ
အေနိန့်ကမ္ဘာမှာ အရေးကြီးရေ အရည်အသွေးတစ်ခုဖြစ်တေ။ ဇာလူမျိုးတိပင် ဖြစ်နီပတ်စီ ကိုယ့်အမျိုးသားအကျိုးစီးပွားအတွက် အသုံးဝင်ဖို့မှန်း၊ အကျိုးဟိဖို့မှန်းသိကေ အနည်းအကျဉ်းဆက်ဆံမှုတိကို မလုပ်ပဲနီလို့မရပါ။ လွန်ခရေ အပတ်က နှစ်ပတ်လည် အစည်းအဝေးတစ်ခုမှာ Caterpillar ၏ ဥက္ကဌနန့် စီအီးအို ဖြစ်တေ Doug Oberhelman က သူရို့၏ ကုမ္ပဏီနန့် တရုတ်ပြည်အကြောင်းကို မိန့်ခွန်းထဲမှာ ပြောလားရေ။ ကတ်တာပီလာ ကုမ္ပဏီရေ ဒေါ်လာဘီလီယံ ၇၀ ကျော် ပိုင်ဆိုင်မှုဟိရေ ကုမ္ပဏီကြီးတစ်ခုဖြစ်ပါရေ။ မြန်မာနိုင်ငံတစ်နိုင်လုံး၏ ကုန်ထုတ်စွမ်းအား GDP တောင် အမေရိကန်ဒေါ်လာဘီလီလျံ ၈၀ ကျော်ပဲ ဟိစွာပါ။ သူရေ ကမ္ဘာ့မှာ အကြီးဆုံး ဆောက်လုပ်ရေးနန့် မိုင်းတူးစက်ကြီးတိ ထုတ်လုပ်တေ ကုမ္ပဏီဖြစ်ပါရေ။ ယင်းသူပြောလားစွာက တရုတ်ပြည်ရေ လူဦးရေ  ၁ ဘီလီလျံကျော် ဟိရေ နိုင်ငံကြီးဖြစ်ကြောင်း၊ ဇာလောက်ပဲ အမေရိကန်နန့် မတည့်ကေလေ့၊ ဇာလောင်ပင် ယုံကြည်မှုစံနှုန်းထားတိ ကွာခြားကေလေ့ မဆက်ဆံပဲ လျစ်လျူရှုထားလို့မရကြောင်း၊ သူရို့ကုမ္ပဏီရေ လောလောဆယ်မှာ ဒေသခံ ပြိုင်ဘက်တိကို နိုင်နီကြောင်း၊ ကုမ္ပဏီ၏ နှစ်ပေါင်း ၈၀ ကျော် အတွေ့အကြုံအရ မိမိရို့ရေ ပြိုင်ဘက်ပေါင်း ၁၀၀ ကျော်ကို ပြိုင်နိုင်ကြောင်း၊ သို့သော် အနာဂတ်မှာ ယင်း ၁၀၀ ကျော်ထဲက မိမိရို့နန့် အကြိတ်အနယ်ပြိုင်နိုင်ရေ ကုမ္ပဏီတစ်ခုနှစ်ခု ပေါ်ထွက်လာနိုင်ပါကြောင်း၊ မိမိရို့အနီနန့် ပြိုင်ဆိုင်နိုင်မည်ဟု အပြည့်အ၀ ယုံကြည်ပါကြောင်း၊ တကယ်လို့ရာ မိမိရို့ တရုတ်ပြည်ကို မ၀င်ကေ တခြား ဂျပန်ကုမ္ပဏီတိ၊ ကိုးရီးယားကုမ္ပဏီတိ လက်ဦးမှု ရသွားမည်ဖြစ်ကြောင်း ပြောကြားသွားသည်။ Fortune 500 ၏ ကမ္ဘာ့အကြီးဆုံး ကုမ္ပဏီ ၅၀၀ မှာ နံပါတ် ၄၄ ချိတ်တေ အေကုမ္ပဏီကြီးကတောင် တရုတ်ကို အကြိုက်ကြီးမဟုတ်ကေတောင်မှာ ယင်းနိုင်ငံထဲကို ၀င်ပြီး စီးပွားရေးတိုးချဲ့နီစွာကို တွိကတ်ရဖို့ ဖြစ်တေ။



တရုတ်ကို မကြိုက်ဆိုတိုင်း တရုတ်ဘာသာကို မလေ့လာချင်၊ မပတ်သက်ချင်ဆိုလို့ ရဖို့လား။ တရုတ်နန့် မပတ်သက်ကေ၊ တရုတ်အကြောင်းကို မလေ့လာကေ တရုတ်အကြောင်းကို အပေါ်ယံပဲ သိဖို့ဂါ။ တရုတ်ပြည်အနောက်တောင်ပိုင်းက Dai (၁၉၅၃ ခုနှစ်ကတည်းက Tai (ယိုးဒယား၊ ရှမ်းလူမျိုး အုပ်စု) အမည်ကို Dai သို့ တရားဝင်ပြောင်းလဲထားသည်။) လူမျိုးတိ၏ ဗုဒ္ဓဘာသာ ထုံးလမ်းစဉ်လာအရ သင်္ကြန်ပွဲတိလေ့ ဆင်နွှဲရေ ဆိုစွာကို သိကတ်ဖို့လားယေ။ တရုတ်၏ ကွဲပြားရေခြားနားရေ ရီမြေ၊ လူမျိုးတိကို သိဖို့သိလားယေ။ ယင်းပိုင်ပျာယ် အိန္ဒိယလူမျိုးကို မယုံဆိုလို့ အိန္ဒိယလူမျိုးတိ နန့် မပတ်သက်ချင်ဆိုလို့ ရဖို့လား။ အာသံ၊ မဏိပူရက လူတိအကြောင်းကို အေဂုမလေ့လာကေ ကုလားတန်မြစ်ကြောင်း စီမံကိန်းပြီးလို့ စီးပွားရေးလမ်းတိ ပွင့်လာရေအချိန်မှာ တခြားလူမျိုးတိက ရခိုင်တိကို ကျော်လားလီဖို့။ မြန်မာ့အလင်းသတင်းစာကို မကြိုက်ကေတောင် ယင်းသတင်းစာမှာ ပါရေ နိုင်ငံတကာ သတင်းကဏ္ဍကို ဖတ်ကေ အနည်းနန့် အများ ဗဟုသုတ ရနိုင်ရေ။

အမေရိကန်ပေါက် နာမည်ကြီးနိုင်ငံရေး သိပ္ပံပညာသျှင် Francis Fukuyama ၏ The End of History and The Last Man ထဲက စာသားကို ရွီးသုံးရကေ Modernize (တိုးတက်အောင်) လုပ်ချင်ရေ လူမှုအဖွဲ့အစည်းရေ Westernize (အနောက်တိုင်းပုံစံပြောင်း)လုပ်ရဖို့လို့ မဆိုလို။ အနောက်တိုင်းပုံစံဆိုစွာတောင် တစ်ပုံစံတည်း ဟိစွာမဟုတ်။ အနောက်နိုင်ငံတိ၏ အုပ်ချုပ်ရေးစနစ်ကိုပဲ ကြည့်။ အဓိက အနှစ်က တစ်ခုတည်းလို့ ဆိုနိုင်ကေတောင်မှ မတူကွဲပြားမှုတိက အများကြီး။ တရုတ်၏ စာရီးစနစ်နန့် ယဉ်ကျေးမှုတိကို ဂျပန်က ငှားရမ်းအသုံးပြုခကေလေ့ ဂျပန်ဆိုရေ သူ့၏ သီးခြားရပ်တည်မှု၊ ကွားခြားမှု သဏ္ဍာန်ချေတိကို ထိန်းထားနိုင်ခရေ။ ယင်းပိုင်ပျာယ် မူဆလင်ဘာသာစာပီတိရေ သမိုင်းတချိုးတကွေ့မှာ ဂရိလူမျိုးတိအပေါ်မှာ ဇာလောက်ပဲ လွှမ်းမိုးခခ၊ ဂရိလူမျိုးတိ၏ လက်ဟိ ၉၇ ရာခိုင်နှုန်းရေ အော့သိုးဒေါ့စ် ခရစ်ယာန်ဘာသာဝင်တိ ဖြစ်တေ။ ခရစ်ယာန်ဘုန်းကြီးတိ ရခိုင်မှာ ဇာလောက်ပဲ နီခနီခ မြောက်ဦးမြို့မှာ ဗုဒ္ဓသာသနိက အဆောက်အအုံတိက မားမားခန့်ခန့် ရပ်နီတုန်း။

တိုးတက်ချင်ရေ လူမှုအဖွဲ့အစည်းတစ်ခုရေ ပြောင်းလဲနီရေ ခေတ်ရီစီကြောင်းကို မျက်ခြေမပြတ်ဖို့လိုရေ။ ပြောင်းလဲကျင့်ကြံနီထိုင်တတ်ဖို့ လိုပါရေ။  ယေဘူယျဆန်လွန်းရေ အတွေးအခေါ်တိကို တသက်လုံး ဆုပ်ကိုင်ပြီးကေ နောက်ဆုံးဖြစ်ပေါ်တိုးတက်မှုတိ၊ ညွှန်ပြမှုတိကို မျက်ကွယ်မပြုထားဖို့ လိုပါရေ။ သမိုင်းကို လေ့လာရာမှာ ဂုဏ်ယူဝင့်ကြွားသင့်စွာကို ၀င့်ကြွားလို့ ရရေ။ ယေကေလေ့ မာန်ထောင်လွှားနီပနာ သမိုင်းက ပီးရေ သင်ခန်းစာကို မယူတတ်ကေ အလကားပျာယ်။ အတိတ်ကို သင်္ခန်းစာယူလို့ အနာဂတ်သမိုင်းကောင်းကို ရီးနိုင်မှ သမိုင်းသင်ရကျိုးနပ်ပါဖို့။ ယေမှရာ ပြည်ရှင်ဘုရင်မင်းဗာ၏ သားကောင်း သမီးကောင်းတိအဖြစ် တိုးတက်ရေ လူမှုအဖွဲ့အစည်းကို ၀ိုင်းဝန်းတည်ဆောက်နိုင်ကတ်ဖို့ ဖြစ်ပါရေ။

အနာဂတ်သမိုင်းကောင်းကို တတူတူ ၀ိုင်းရီးနိုင်ဖို့ မျှော်လင့်ယင်း.....


"Modernization consists of "industrialization; urbanization; increasing levels of literacy, education, wealth, and social mobilization; and more complex and diverse occupational structures." (Unique, p 29) To that list could be added 1) technically rational modes of thought, 2) economic structures consistent with producing high technology goods, and 3) socio-political institutions that allow a society to participate in the global economy and modern technological development." (Samuel Huntington)

ရည်ညွှန်း

၁။ http://www.dflorig.com/CHAP2.html
၂။ https://www.cia.gov/library/publications/the-world-factbook/geos/bm.html
၃။ http://www.caterpillar.com/company/history
၎။ http://en.wikipedia.org/wiki/Caterpillar
၅။ Japan: Memoirs of a Secret Empire, Episode 3: The Return of the Barbarians (documentary)
၆။ http://en.wikipedia.org/wiki/Matthew_C._Perry


--
"Plan your Work, Work your Plan"